Trampın 1980-ci ildə İranla bağlı çıxışı yayıldı: Nələr deyirmiş... – VİDEO

Bakupost.az Musavat.com-a istinadla xəbər verir ki, yayılan videoda Tramp ABŞ hökumətinin İranla bağlı siyasətini sərt tənqid edir və Vaşinqtonun daha qətiyyətli addımlar atmalı olduğunu bildirir.

Video ABŞ tarixində ən böyük diplomatik böhranlardan biri hesab edilən "Iran hostage crisis" (İran girov böhranı) dövrünə aiddir. Həmin hadisələr 1979–1981-ci illərdə baş verib və İran inqilabından sonra Tehrandakı ABŞ səfirliyinin tutulması ilə başlamışdı.

Arxiv görüntülərində jurnalist Trampa ABŞ rəhbərliyinin İrana münasibəti barədə sual verir. Tramp cavabında o dövrdə hakimiyyətdə olan Cimmi Karter administrasiyasını zəif mövqe tutmaqda ittiham edir.

Tramp deyir ki, ABŞ hökuməti İran qarşısında kifayət qədər sərt davranmayıb və bu, Amerikanın nüfuzuna zərbə vurub. Onun fikrincə, Vaşinqton daha qətiyyətli mövqe nümayiş etdirməli idi.

Jurnalist daha sonra Trampa belə bir sual ünvanlayır: “Should the United States send troops to Iran?” (ABŞ İrana qoşun yeritməlidirmi?)

Tramp isə cavabında belə deyir: “Yes, I think so.” (Bəli, mən belə düşünürəm.)

Bu arxiv çıxışı göstərir ki, Tramp hələ 1980-ci ildə – yəni təxminən 46 il əvvəl – İran məsələsində olduqca sərt və radikal mövqedən çıxış edirdi. Onun fikrincə, ABŞ qlobal siyasətdə zəif görünməməli və lazım gəldikdə hərbi gücdən istifadə etməlidir.

Trampın həmin dövrdə səsləndirdiyi fikirlər onun dünya siyasətinə baxışının çox əvvəldən formalaşdığını göstərir. Ekspertlər qeyd edirlər ki, ABŞ prezidentinin İran və Yaxın Şərqlə bağlı sərt ritorikası illər sonra da dəyişməyib və bu yanaşma onun prezidentliyi dövründə həyata keçirilən siyasətdə də öz əksini tapıb.

Görünən budur ki, Trampın gənclik illərində səsləndirdiyi bu mövqelər onun ABŞ-ın qlobal roluna dair baxışlarını və güc siyasətinə üstünlük verən düşüncə tərzini göstərən mühüm arxiv materialıdır.

Həmin video görüntüləri təqdim edirik: