Avstraliyalı alimlər ağciyər xərçənginin ən aqressiv növlərindən biri ilə mübarizədə mühüm nəticə əldə ediblər. Müəyyən olunub ki, immun sisteminin xüsusi hüceyrələri xərçəng hüceyrələrini tanıyaraq məhv edə bilir.
Medicina.az xəbər verir ki, Uolter və Eliza Hall Tibb Tədqiqatları İnstitutunun (WEHI) alimlərinin apardığı araşdırmanın nəticələri nüfuzlu “Cancer Cell” elmi jurnalında dərc olunub.
Tədqiqat kiçik hüceyrəli ağciyər xərçənginə həsr edilib. Bu xəstəlik sürətlə inkişaf etməsi və müalicəyə çətin tabe olması ilə seçilir. Onun əsas xüsusiyyətlərindən biri xərçəng hüceyrələrinin immun sistemindən yayınmaq qabiliyyətidir.
Alimlər müəyyən ediblər ki, qamma-delta T hüceyrələri adlanan xüsusi immun hüceyrələri digər müdafiə mexanizmlərinin tanıya bilmədiyi şiş hüceyrələrini aşkar edərək məhv edə bilir.
Araşdırma zamanı xəstələrdən götürülən nümunələr əsasında laboratoriyada kiçik şiş modelləri yetişdirilib. Daha sonra həmin xəstələrin qanından ayrılan qamma-delta T hüceyrələri bu modellərə əlavə olunub. Nəticədə immun hüceyrələrinin xərçəng hüceyrələrini uğurla məhv etdiyi müşahidə edilib.
Alimlər mövcud iki dərmanın bu təsiri daha da gücləndirdiyini müəyyən ediblər.
Zoledronat preparatı qamma-delta T hüceyrələrinin sayını və şişi tanımaq qabiliyyətini artırıb. Tarlatamab isə immun hüceyrələri ilə xərçəng hüceyrələrinin qarşılıqlı təmasını gücləndirib. Hər iki preparat birlikdə tətbiq edildikdə laboratoriya şəraitində xərçəngə qarşı mübarizənin effektivliyi əhəmiyyətli dərəcədə yüksəlib.
Tədqiqatçılar həmçinin iki böyük klinik sınağın – IMpower133 və CASPIAN-ın nəticələrini təhlil ediblər. Məlum olub ki, şişlərində qamma-delta T hüceyrələrinin daha çox olduğuna dair göstəricilər aşkar edilən xəstələr immunoterapiyadan daha çox fayda görüblər.
Araşdırmanın rəhbərlərindən professor Keyt Sazerlend bildirib ki, bu kəşf indiyədək müalicəsi olduqca çətin olan ağciyər xərçənginə qarşı yeni immunoterapiya üsullarının hazırlanmasına imkan yarada bilər.
Alimlər növbəti mərhələdə həmin immun hüceyrələrinin laboratoriyada çoxaldılaraq xəstələrin orqanizminə geri köçürülməsi imkanlarını da araşdırırlar.
Bununla belə, mütəxəssislər vurğulayırlar ki, nəticələr hələ xərçəngin yeni müalicə üsulunun təsdiqlənməsi demək deyil. Laboratoriya təcrübələrində əldə olunan uğurların xəstələrdə də təkrarlanması üçün əlavə klinik sınaqlara ehtiyac var.
Qeyd edək ki, tədqiqatın nəticələri WEHI institutu tərəfindən oktyabrın 15-də ictimaiyyətə açıqlanıb.
MEDİA