Ali təhsildə dönüş nöqtəsi: Qazıxtanla Azərbaycan arasında tarixi anlaşma

Bakupost.az xəbər verir ki, son illər Azərbaycanla Qazaxıstan arasında təhsil sahəsi üzrə əməkdaşlıq xüsusi diqqət çəkir.

Bu fonda aprelin 6-da Almatı şəhərində keçirilən Qazaxıstan və Azərbaycan ali təhsil müəssisələrinin II Rektorlar Forumu da mühüm əhəmiyyət daşıyır.

Forumun rəsmi açılışında Azərbaycan elm və təhsil naziri Emin Əmrullayev və Qazaxıstanlı həmkarı Sayasat Nurbek arasında universitet rəhbərlərinin və aidiyyəti qurumların nümayəndələrinin iştirakı ilə görüş keçirilib. Tərəflər ali təhsil sahəsində dövlətlərarası əməkdaşlığın inkişafı, o cümlədən akademik mobillik, birgə təhsil proqramları, tərəfdaşlıq əlaqələrinin genişləndirilməsi ilə bağlı cari məsələləri müzakirə ediblər.

Hər iki nazir çıxışlarında forum çərçivəsində imzalanacaq yeni anlaşmaların tərəfdaşlığı daha da gücləndirəcəyinə, tələbə və müəllimlər üçün yeni imkanlar yaradacağına inam ifadə ediblər.

Onu da qeyd edək ki, Forum çərçivəsində Azərbaycanın 18 universiteti ilə Qazaxıstanın 29 universiteti arasında 65 yeni memorandum imzalanıb. Habelə, tələbə mübadiləsinin genişləndirilməsi də nəzərdə tutulub. Xatırladaq ki, 2025-ci ilin məlumatına görə, Qazaxıstanın 58 universitetində 346 Azərbaycan vətəndaşı və Azərbaycan universitetlərində 180 Qazaxıstan vətəndaşı oxuyur.

Həmin gün həmçinin Əl-Farabi adına Qazax Milli Universitetinin Farabi Hub İnnovasiya Mərkəzində Azərbaycan ali təhsil müəssisələrinin “Study in Azerbaijan” beynəlxalq sərgisinin açılış mərasimi də baş tutub.

Bu sərgi iki ölkə arasında təhsil və elm sahələrində strateji tərəfdaşlığın gücləndirilməsi, tələbələr, eləcə də gənc mütəxəssislərin Azərbaycanda təhsil almaq imkanları barədə məlumatlandırılması məqsədi daşıyır. Sərgidə Azərbaycanın 25-ə yaxın aparıcı universiteti təmsil olunub.

Sərgidə ölkəmizə təmsil edən universitetlərdən biri də Bakı Dövlət Universiteti olub. BDU sərgidə xüsusi stendlə iştirak edərək öz təhsil proqramlarını, elmi fəaliyyət istiqamətlərini və beynəlxalq əməkdaşlıq imkanlarını ziyarətçilərə təqdim edib. Sərgidə Universitetin stendinə böyük maraq müşahidə olunub. Abituriyentlər və digər iştirakçılar BDU-da təhsil alma imkanları ilə bağlı suallar ünvanlayaraq, qəbul prosedurları və gələcək karyera perspektivləri barədə məlumat alıblar. Azərbaycan Texniki Universiteti (AzTU) də sərgidə öz nailiyyətlərilə təmsil olunub.

Eyni zamanda, AzTU ilə Qazaxıstanın L.B.Qonçarov adına Qazax Avtomobil və Yol İnstitutu, Ş.Y. Yesenov adına Xəzər Dövlət Texnologiya və Mühəndislik Universiteti, Karaqanda Dövlət Texniki Universiteti, META Universiteti, Rudnıy Sənaye İnstitutu, Qorqud Ata Dövlət Qızılorda Universiteti, Satbayev adına Qazax Milli Tədqiqat Texniki Universiteti, Atırau Neft və Qaz Universiteti, Serikbayev adına Şərqi Qazaxıstan Texniki Universiteti arasında memorandum imzalanıb. Məqsəd akademik mübadilə, elmi əməkdaşlıq və birgə təhsil proqramlarının inkişaf etdirilməsidir.

Sərgi çərçivəsində abituriyent və tələbələr Azərbaycandakı ali təhsil proqramları, akademik imkanlar və elmi nailiyyətlər haqqında məlumat əldə edə bilərlər. Sərgidə həmçinin qrantlar, akademik mobillik, ikili diplom proqramları və qəbul tələbləri ilə bağlı ətraflı məlumatlar verilir. Tanışlıq çərçivəsində mərkəzin müasir laboratoriyalarına da baxış keçirilib.

Emin Əmrullayevin rəhbərlik etdiyi nümayəndə heyəti səfər çərçivəsində aprelin 7-də Satbayev adına Qazax Milli Tədqiqat Texniki Universitetini ziyarət edərək universitetin rəhbər heyəti ilə də görüşüb. Tərəflər arasında ali təhsil və tədqiqat sahəsində birgə təşəbbüslərin həyata keçirilməsi imkanları müzakirə olunub, o cümlədən universitetin maddi-texniki bazası ilə tanışlıq keçirilib. Daha sonra Əmrullayev Qazaxıstanda təhsil alan Azərbaycan Dövlət Neft və Sənaye Universitetinin tələbələri ilə görüşüb.

Bu səfər Azərbaycanla Qazaxıstan universitetləri arasında əlaqələrin genişlənməsi baxımından da faydalı olub. Belə ki, Qarabağ Universiteti ilə dünya universitetləri reytinqində 166-cı yeri tutan Əl-Farabi adına Qazax Milli Universiteti arasında əməkdaşlıq memorandumu imzalanıb. Bu memorandum qarşılıqlı faydalı əməkdaşlığa böyük töhfə verəcək.

Forum çərçivəsində universitetlər arasında əməkdaşlıq sənədlərinin imzalanması mərasimi keçirilib. BDU Qazax Milli Qadın Pedaqoji Universiteti və Ablay xan adına Qazaxıstan Beynəlxalq Münasibətlər və Dünya Dilləri Universiteti ilə anlaşma memorandumu, həmçinin Abay adına Qazax Milli Pedaqoji Universiteti və Atırau Neft və Qaz Universiteti ilə ikili diplom proqramlarının həyata keçirilməsini nəzərdə tutan niyyət protokolları imzalayıb. İmzalanan sənədlər əsasən ikili diplom proqramlarının təşkili, birgə elmi fəaliyyət və akademik mübadilənin genişləndirilməsini əhatə edir.

Tədbirdə təmsil olunan Azərbaycan universitetlərindən biri də Azərbaycan Dövlət İqtisad Universiteti olub. Onunla Qazaxıstanın bir sıra universitetləri arasında əməkdaşlıq müqavilələri imzalanıb.

Eyni zamanda, Bakı Ali Neft Məktəbi (BANM) ilə Qazaxıstanın 4 universiteti arasında Anlaşma Memorandumu imzalanıb.

Bakı Ali Neft Məktəbi ilə Qazaxıstanın Mukhametzhan Tynyshbayev adına ALT Universiteti, Almatı Texnoloji Universiteti, K.I. Satbayev adına Qazax Milli Tədqiqat Texniki Universiteti və Ş. Yessenov adına Xəzər Texnologiya və Mühəndislik Universiteti arasında əməkdaşlığa dair Anlaşma Memorandumu imzalanıb.

Azərbaycan ali təhsil müəssisələri rəhbərlərinin Qazaxıstana edilən bu səfəri və imzalanan sənədlər hər iki ölkə arasında təhsil sahəsində əməkdaşlıq və əlaqələrin inkişafına birmənalı şəkildə böyük töhfə verəcək. Sözügedən tədbirlər həmçinin Azərbaycan universitetlərinin beynəlxalq miqyasda tanınmasında mühüm rol oynayacaq, beynəlxalq əlaqələrin daha da artmasına stimul verəcək. Digər tərəfdən, Qazaxıstanda baş tutan bu görüşlər xarici tələbələrin təhsil almaq üçün ölkəmizə marağının artması baxımından da mühüm addım olacaq.