Bakıda avtobuslar pulsuz ola bilərmi?

"Bakupost" xəbər verir ki, bu sözləri “Yeni Sabah”a açıqlamasında iqtidsadçı Natiq Cəfərli bildirib.

Onun sözlərinə görə, nəqliyyatda gediş haqqı zamana bağlı olmalıdır:

“Bütün nəqliyyat növlərində keçərli olan biletlər satılmalıdır. Bir saatlıq biletlərdən tutmuş bir illik biletlərə kimi. Təbii ki, bu, müxtəlif qiymətlərlə və tariflərlə tənzimlənməlidir. 1 saatlıq bilet o deməkdir ki, insan 1 saat ərzində istənilən marşrutu dəyişə bilər. Məsələn, avtobusa minir, metroya keçir və iş yerinə getmək üçün bir neçə nəqliyyat vasitəsindən istifadə edir. Yəni 1 saatlıq bilet alıb 3 nəqliyyat vasitəsindən istifadə edir, amma cəmi bir dəfə ödəniş edir. Bu nöqteyi-nəzərdən Azərbaycanda nəqliyyat siyasətinə və buna baxış tərzinə dəyişiklik edilməlidir”.

Ekspert qeyd edib ki, elə ailələr var ki, mövcud qiymətlər onların büdcəsinə ciddi təsir göstərir:

“Bəzi ailələr isə şəxsi avtomobilə üstünlük verirlər. İctimai nəqliyyat nə qədər əlçatan və ucuz olsa, ondan istifadə edənlərin sayı da bir o qədər artacaq. Bəzi şəhərlər var ki, ictimai nəqliyyatı hətta pulsuz ediblər. Məsələn, Estoniyada və Lüksemburqda belə bir təcrübə var. Polşanın 9 şəhərində isə nəqliyyat xərclərini bələdiyyə özü ödəyir. Bu nöqteyi-nəzərdən Azərbaycanda da nəqliyyat siyasətinə yeni baxış lazımdır”.