Dəm qazından necə qorunaq? – Qızıl qaydalar

Qış mövsümü yaxınlaşdıqca dəm qazından zəhərlənmə halları artır.

Bəs dəm qazından necə qorunaq?

Bakupost.az Milli.az-a istinadən xəbər verir ki, təhlükəsizlik məsələləri üzrə ekspert Samir Nəbiyevin sözlərinə görə, dəm qazından zəhərlənmənin səbəbi əksər hallarda evlərdə quraşdırılan pitiminutka kimi tanınan qızdırıcılardır.

Ekspert xəbərdarlıq edir ki, qış mövsümündən əvvəl evlərin bacaları və qızdırıcılar təmizlənməlidir. Həyati təhlükənin qarşısını almaq üçün su qızdırıcılarını hamamdan çıxardıb açıq eyvanda və ya ərazidə təhlükəsiz şəkildə quraşdırmaq lazımdır. Tıxanmış bacalar tüstünün otağa dolmasına şərait yaradır və bu da dəm qazının toplanmasına səbəb olur:

“Qapı və pəncərələrin tam bağlanması, xüsusilə isitmə cihazları işləyən zaman, təhlükəni artırır. Otaqlarda az da olsa hava dövranı təmin edilməlidir. Qapının altından və ya pəncərədən kiçik hava girişləri təhlükənin qarşısını əhəmiyyətli dərəcədə azalda bilər.

Son illər bir çox evlərdə CO detektorları quraşdırmaq tövsiyə edilir. Bu cihazlar təhlükəli qaz səviyyəsini dərhal aşkarlayır və səsli siqnal vasitəsilə sakinləri xəbərdar edir. Mütəxəssislər belə detektorların xüsusilə fərdi evlərdə mütləq quraşdırılmalı olduğunu bildirirlər.

Dəm qazı zəhərlənməsindən şübhələndikdə ilk olaraq pəncərə və qapılar açılmalı, təmiz hava təmin edilməlidir. Zərərçəkmiş şəxs dərhal açıq havaya çıxarılmalı və təcili tibbi yardıma müraciət edilməlidir".

Ekspert qeyd edib ki, dəm qazı təhlükəsi az qala görünməz riskdir, lakin qaydalara əməl etməklə tamamilə qarşısı alına bilər. Havalandırmaya diqqət yetirmək, cihazları vaxtında yoxlatdırmaq və CO detektoru quraşdırmaq həm ailənin, həm də evin təhlükəsizliyini təmin edən ən əsas addımlardır.