Ermənistan ABŞ-dən “V-BAT” PUA-ları əldə etdi

Bakupost.az xəbər verir ki, bu barədə Baş nazir Nikol Paşinyan İrəvanda səfərdə olan ABŞ-nin vitse-prezidenti Ceyms Di Venslə keçirdiyi birgə mətbuat konfransı zamanı məlumat verib.

Paşinyan qeyd edib ki, bu addım iki ölkə arasında illərdir davam edən təhlükəsizlik əməkdaşlığının və üç illik “Qartal Tərəfdaş” (Eagle Partner) birgə hərbi təlimlərinin məntiqi davamıdır. Baş nazir ABŞ-nin Xarici Hərbi Satış (FMS) proqramı çərçivəsində əldə olunan “V-BAT” PUA-larının ölkənin müdafiə qabiliyyətinin gücləndirilməsinə mühüm töhfə verəcəyini vurğulayıb.

Məlumat üçün bildirək ki, “Shield AI” şirkəti tərəfindən istehsal olunan “V-BAT” PUA-ları şaquli qalxma və enmə (VTOL) xüsusiyyətinə malikdir. Bu cihazlar xüsusilə çətin relyefli ərazilərdə kəşfiyyat və müşahidə missiyaları üçün effektivliyi ilə tanınır.