FHN təhlükəni təsdiqləyib, problem isə qalır – Bakı sakini kömək istəyir

Sakinin sözlərinə görə, binada yanğınəleyhinə avadanlıqlar yararsız vəziyyətdədir, mərtəbələrdə təxliyə çıxışları bağlanıb. O, məsələ ilə bağlı dəfələrlə Fövqəladə Hallar Nazirliyinin qaynar xəttinə müraciət etdiyini, əraziyə baxış keçirən FHN əməkdaşlarının da göstərilən nöqsanları təsdiqlədiyini deyir.

Maraqlıdır ki, FHN-in vətəndaşa göndərdiyi rəsmi cavab məktublarında da müraciətdə göstərilən faktların təsdiqini tapdığı qeyd olunur.

“Əməkdaşlarımız tərəfindən sözügedən ünvana baxış keçirilən zaman müraciətdə qeyd olunan faktın öz təsdiqini tapdığı müəyyən olunmuşdur”.

1-ci Ərazi Dövlət Yanğın Nəzarəti İdarəsinin rəisi vəzifəsini icra edən Fərid Qonaqovun adından göndərilən digər cavab məktubunda isə yenidən faktların təsdiqləndiyi vurğulanır. Həmçinin yanğın təhlükəsizliyi sahəsində aşkar edilmiş pozuntularla əlaqədar binanın komendantı Şamil Əliyev barəsində inzibati xəta haqqında protokol tərtib edildiyi bildirilir.

Elman Eldaroğlu məsələnin başqa bir tərəfinə də diqqət çəkir. Onun iddiasına görə, məktubda adı çəkilən komendant “Binəqədi-38” MMMC-də rəsmi əmək müqaviləsi olmadan çalışır. Sakin hesab edir ki, belə olan halda binanın saxlanılması və təhlükəsizliyinə görə məsuliyyətin kim tərəfindən daşındığı, inzibati protokolun hansı hüquqi əsaslarla məhz komendant barəsində tərtib edildiyi də araşdırılmalıdır.

O, komendantın əmək münasibətlərinin rəsmiləşdirilib-rəsmiləşdirilmədiyinin aidiyyəti dövlət qurumları tərəfindən yoxlanılmasını istəyir.

Sakinin qaldırdığı digər məsələ binada elektrik avtomobillərinin enerji ilə doldurulması üçün quraşdırıldığı bildirilən avadanlıqla bağlıdır. Elman Eldaroğlu həmin qurğunun qanunvericiliyin və yanğın təhlükəsizliyi normalarının tələblərinə uyğun olub-olmadığının araşdırılmasını tələb edir. Onun sözlərinə görə, həmin qurğudan binada yaşayan və FHN sistemində rəhbər vəzifədə çalışan şəxslərdən biri də istifadə edir.

“Əgər sabah binada yanğın baş versə, bağlı təxliyə çıxışları və işləməyən yanğınsöndürmə vasitələri insanların həyatını təhlükə qarşısında qoya bilər. Faktlar artıq FHN tərəfindən də təsdiqlənib. Biz cərimə haqqında məktub yox, problemin həllini istəyirik”, – deyə sakin bildirir.

Məsələ ilə bağlı Fövqəladə Hallar Nazirliyinin, Binəqədi Rayon İcra Hakimiyyətinin, Əmək və Əhalinin Sosial Müdafiəsi Nazirliyinin, İqtisadiyyat Nazirliyi yanında Əmlak Məsələləri Dövlət Xidmətinin, Ədliyyə Nazirliyinin, “Azərişıq” ASC-nin və “Binəqədi-38” MMMC-nin mövqeyini dərc etməyə hazırıq.