Fransada rekord istilər: bir həftədə minlərlə ölüm qeydə alındı

“Bakupost”un yerli KİV-lərə istinadən verdiyi məlumata görə, Fransanın səhiyyə naziri Stefani qeyd edib ki, 22–28 iyun tarixləri arasında isti hava dalğası səbəbindən əvvəlki illərin orta göstəricisindən əlavə olaraq 2025 ölüm hadisəsi qeydə alınıb.

Bundan əvvəl Fransa Səhiyyə Nazirliyi 24–28 iyun tarixləri arasında baş verən istilərlə əlaqədar təxminən 1000 əlavə ölüm hadisəsinin baş verdiyini açıqlamışdı. Lakin son məlumatlar vəziyyətin daha ciddi olduğunu ortaya qoyur.

Təxminən iki həftə davam edən isti hava dalğası ölkədə həyatın bir çox sahəsinə mənfi təsir göstərib. Nəqliyyat, səhiyyə, təhsil və istehsal sektorlarında ciddi çətinliklər yaşanıb. Xüsusilə paytaxt Parisdə vəziyyət daha ağır olub. Belə ki, 26 iyun tarixində yalnız bir gün ərzində isti hava səbəbindən 109 nəfərin həyatını itirdiyi bildirilib.

Mütəxəssislər yaxın günlərdə vəziyyətin daha da gərginləşə biləcəyi barədə xəbərdarlıq edirlər. Proqnozlara görə, gələn həftədən etibarən yeni isti hava dalğasının bütün ölkəni əhatə edəcəyi gözlənilir.