Fransada siyasi böhran: Partiyalar Makronun istefasını tələb edir

Bakupost.az xəbər verir ki, bu barədə "The New York Times" yazıb.

Nəşrin məlumatına görə, son 20 ayda Fransada artıq dörd baş nazir dəyişib, beşincinin isə taleyi sual altındadır. Bu, 1958-ci ildə Beşinci Respublika yaradıldıqdan bəri görünməmiş siyasi böhrandan xəbər verir.

Bayrunun hökumətinə qarşı “Milli Birlik” və “Boyun əyməyən Fransa” partiyaları çıxış edir. Onlar Milli Məclisdə 577 yerdən 330-na sahibdirlər ki, bu da baş nazirə etimadsızlıq səsverməsi üçün kifayətdir.

"NYT" yazır ki, müxalifət yalnız Bayru ilə kifayətlənməyəcək. Radikal sol və sağ qüvvələr reytinqi 15 faizədək enmiş Makronun dərhal istefasına nail olmaq və erkən prezident seçkilərinə gedilməsini istəyirlər.

Bundan əvvəl “Boyun əyməyən Fransa”nın funksioneri Aurelien Taşe bildirib ki, partiya Makronun impiçmenti prosedurunu başlatmaq niyyətindədir. Onun sözlərinə görə, hazırkı prezidentin siyasəti ölkə vətəndaşlarının böyük əksəriyyəti tərəfindən dəstəklənmir.