Hindistanda içməli su faciəsi – 14 nəfər öldü

Hindistanın Madhya Pradeş ştatının İndore şəhərində içməli su təchizatında baş vermiş çirklənmə nəticəsində ən azı 14 nəfər həyatını itirib, 140-dan çox insan isə xəstəxanaya yerləşdirilib.

Bakupost.az “The Indian Express”ə istinadən xəbər verir ki, hadisə yerli Bhagirathpura məhəlləsində qeydə alınıb, sakinlər son günlər təmizlənməmiş və çirkli görünən kran suyundan istifadə etdikdən sonra ağır qusma, ishal və susuzluq simptomları ilə xəstəxanaya müraciət ediblər.

İndore meri Puşyamitra Bharqava bildirib ki, rəsmi statistikaya əsasən 3 ölüm təsdiqlənib, lakin sakinlər ölənlərin sayının daha çox, 6 aylıq körpə də daxil olmaqla 14 nəfər olduğunu iddia edirlər. Bu fərqlər, hadisənin hələ də tam dəqiq statistikaya malik olmaması ilə izah edilir. Körpənin valideynləri bildiriblər ki, həmin sudan içdikdən sonra uşaqda qusma və ishal meydana gəlib.

İlkin araşdırmalar göstərir ki, sızma nəticəsində şəhər su təchizatı xəttinə kanalizasiya sularının qarışması çirklənməyə səbəb olub. Bu səbəbdən daxili suların kran suyu kimi istifadəsindən çəkinmək üçün sakinlərə xəbərdarlıq edilib.

Cavid, BakuPost