Kim nə düzəltdi? – Şimali Koreyanın yeni sualtı qayığı bölgədə güc balansını dəyişəcək

Şimali Koreya lideri Kim Çen In ölkənin yeni atom enerjili raket daşıyıcısı layihəsinin inşası ilə tanış olub və sualtı qayığı strateji nüvə qalxanının əsas hissəsi kimi qiymətləndirib.

Bakupost.az Şimali Koreya dövlət mediasına istinadən xəbər verir ki, 8 700 tonluq atom sualtı qayıq raketlərlə təchiz olunacaq. Bu, qayıq ölkənin nüvə qoruyucu potensialını əhəmiyyətli dərəcədə artıracaq.

Kim Çen In qayıq tikilən tərsanədə işlərin gedişatını nəzərdən keçirərkən xarici təhlükələrə qarşı suverenliyi qorumağın vacibliyini vurğulayıb. O, yeni strateji idarə olunan raketlərin bu sualtı qayıqda yerləşdiriləcəyini bəyan edib.

ABŞ və beynəlxalq media da bu layihənin görüntülərini təsdiqləyib və qayığın çox hissəsinin gövdə formalaşması mərhələsində olduğunu bildirib. Mühərrik və reaktor kimi əsas komponentlərin artıq qurulmuş ola biləcəyi istisna edilmir. Bu, Pxenyanın dənizdə nüvə raketlərini gizli və müəyyən radiusda atmaq imkanını əhəmiyyətli dərəcədə artıracaq.



Atom enerjili sualtı qayıq növü strateji sualtı raket daşıyıcısı olacaq. Hərbi mənbələr buna ballistik və ya böyük ərazini əhatə edən zərbələr üçün nəzərdə tutulmuş raketlər kimi baxır.

Kim Çen In bu addımı Cənubi Koreya və ABŞ ın nüvə layihələrinə cavab kimi də görür və Seul Vaşinqton əməkdaşlığını “təhlükə və təxribat” adlandırıb.

Yeni sualtı qayıq həm regionda gərginliyi, həm də Pxenyanın dərinləşmiş nüvə və dəniz hərbi strategiyasının gücünü artıracaq.

Cavid, BakuPost