"Kirayə ev verənlər vergidən yayınır” - Millət vəkili

"Mövcud qanunvericiliyə əsasən, mənzillər kirayə verilən zaman kirayə müqaviləsinin bağlanması və buna uyğun olaraq da verginin ödənilmə­si tələb olunur. Bu, Vergi Məcəlləsinin tələblərindən biridir. Buna görə də mənzillər müqavilə bağlanmadan kirayə verilirsə, bu, vergi qanunvericiliyinin tələblərinin pozulması deməkdir”.

"Eyni zamanda nəzərə almaq lazımdır ki, müqaviləsiz mənzil kirayə verilməsi, həm də vergidən yayınmaqdır. Bu baxımdan da Vergi Məcəlləsinə uyğun olaraq vergidən yayınmaqla bağlı cərimələr nəzərdə tutulub. Hesab edirəm ki, mənzillər kirayə verilən zaman müqavilələrin bağlanması məsələsində vətəndaşlar xüsusilə diqqətli olmalıdır. Həmçinin müqavilə bağlanması məsuliyyətin bölüşdürülməsi və mənzildən istifadə edən zaman gözlənilməz ziyanların qarşılığının öncədən müqavilə ilə müəyyənləşdirilməsi və aradan qaldırılmasına imkan yaradır. Beynəlxalq təcrübədə bu cür nümunə var. Belə ki, vətəndaş öz mənzilini kirayə verən zaman müqavilədə əşyaları qeyd edir, hətta təzminatla bağlı məbləğ müəyyən olunur. Əgər kirayə qalan şəxs evdən çıxan zaman əşyalara və ya mənzilə zərər vurarsa, bunun qarşılığını ödəyir. Məhz bu istiqamətdə müəyyən təkmilləşdirmələrin aparılmasına ciddi ehtiyac var. Tərəflər üçün ən doğru yol vergini vermək və müqaviləni qanuni şəkildə bağlamaqdır”.