Luvrda polis əməliyyatı – 10 nəfər saxlanıldı

Fransa polisi Luvr Muzeyində fəaliyyət göstərdiyi iddia olunan genişmiqyaslı bilet fırıldaqçılığı şəbəkəsini ifşa edib. Əməliyyat zamanı arasında muzey işçiləri və turist bələdçilərinin də olduğu 10 nəfər saxlanılıb.

Bakupost.az “Le Parisien” qəzetinə istinadən xəbər verir ki, şübhəlilər əsasən çinli turistləri hədəf alır, saxta giriş kartları sataraq bələdçi tur rezervasiyalarında külli miqdarda qanunsuz gəlir əldə edirdilər.

Muzey rəhbərliyi “qeyri-qanuni halları” aşkar etdikdən sonra polis iki gün əvvəl əməliyyat keçirib. Əməliyyat zamanı üç avtomobilə həbs qoyulub, 130 min avro nağd pul, bank hesablarında təxminən 200 min avro və bank kassalarında böyük məbləğdə nağd pul müsadirə edilib.

Muzey rəhbərliyi açıqlamasında bildirib ki, fırıldaqçılığın qarşısını almaq üçün qeyri-qanuni halların xəritələşdirilməsi, hüquqi, texniki və nəzarət tədbirlərini əhatə edən strukturlaşdırılmış plan icra olunub və nəticələr davamlı izlənilir.

Saxlanmalar, dünyanın ən çox ziyarət edilən muzeylərindən biri və Fransanın mədəni irsinin önəmli institutu olan Luvr üçün son dönəmdə baş verən mənfi hadisələrin ardınca gəlib.

Son ay ərzində işçilərin maaş və iş şəraitindən narazı qaldığı üçün başlanan tətillər səbəbindən muzey hər həftə qismən bağlanır.

Tətil prosesi, ötən ilin sonunda Fransa Krallıq Zərgərlik Əsərlərinin gündüz vaxtı soyulması və bu hadisədən sonra hazırlanmış hökumət hesabatında təhlükəsizlik boşluqlarının üzə çıxması ilə başlayan müzakirələr fonunda başlamışdı.

Eyni zamanda, Luvr Avropadan kənar gələn ziyarətçilərdən alınan giriş haqlarını artırmaqla yenidənqurma işlərini maliyyələşdirməyə çalışdığı üçün tənqidlərin hədəfi olub.

Muzey rəhbərliyi bildirib ki, bilet qiymətinin 22 avrodan 32 avroya yüksəldilməsi, Versal Sarayı, Paris Operası və Sent-Şapel (Müqəddəs Kilsə) də daxil olmaqla bir çox mədəni obyektlərdə tətbiq edilən milli “differensial qiymətləndirmə” siyasətinin tərkib hissəsidir.

Cavid, BakuPost