Mehdiabaddan Biləcəriyə qədər maşını arxa-arxaya sürdü - VİDEO

Bakupost.az Avtosfer.az-a istinadla xəbər verir ki, hadisə Abşeron rayonu, Mehdiabad qəsəbəsi ərazisində, Gənclər şəhərciyi yaxınlığında baş verib. Kadrlarda toy karvanında iştirak edən avtomobillərdən birinin, “Şevrolet” markalı maşının sürücüsünün qeyri-adi və təhlükəli manevr etdiyi görünür. Sürücü eyni davranışı Binəqədi rayonu ərazisində də təkrarlayıb.

Belə ki, sürücü hərəkətdə olan yolda avtomobili tərsinə sürərək həm özünü, həm də digər hərəkət iştirakçılarını ciddi risk altına atıb. Bu davranış yol hərəkəti qaydalarının kobud şəkildə pozulması kimi qiymətləndirilir.

Paylaşılan görüntülər qısa müddətdə sosial şəbəkələrdə geniş yayılıb və istifadəçilər tərəfindən kəskin tənqid olunub. Bir çoxları bu cür məsuliyyətsiz hərəkətlərin ağır nəticələrə səbəb ola biləcəyini vurğulayıb.

Mütəxəssislər bildirirlər ki, bu tip “şou xarakterli” hərəkətlər, xüsusilə toy karvanlarında tez-tez rast gəlinir və əksər hallarda qəza riskini artırır. Onlar sürücüləri emosiyalara qapılmadan, yol hərəkəti qaydalarına ciddi əməl etməyə çağırırlar.

Qeyd edək ki, bu cür qayda pozuntuları inzibati məsuliyyət yaradır və sürücülər barəsində qanunvericiliyə uyğun tədbirlər görülə bilər.