Mircəfər Bağırovun əşyası 18 min manata satılır - FOTOLAR

Bakupost.az Modern.az-a istinadən xəbər verir ki, sözügedən mebelin 1951-ci il istehsalı olduğu və ondan yalnız bir ədəd hazırlandığı bildirilir.

Mebeli satışa qoyan şəxslərin sözlərinə görə, M.Bağırovun bu mebelin yanında dayandığını əks etdirən fotoşəkil də mövcuddur. Mebelin çəkisinin 100 kiloqramdan artıq olduğu qeyd edilir.

Əşyanın satış qiyməti 18 min manat olaraq müəyyənləşdirilib. Satışı həyata keçirən şəxslər əvvəlcə mebeli Rusiya bazarına çıxarmağı düşünsələr də, sonda onu Azərbaycan kolleksiyenerləri üçün təqdim etməyə qərar veriblər.

Məlumata görə, bu mebel Bakıda təsadüfən aşkarlanıb. Onun tarixçəsi barədə məlumatlar isə digər kolleksionerlər tərəfindən təqdim olunub.

Qeyd olunur ki, sözügedən mebel təxminən 10 il əvvəl də satışa çıxarılıb.

Xatırladaq ki, Mircəfər Bağırov 1933-1953-cü illərdə Azərbaycan Kommunist Partiyası Mərkəzi Komitəsinin birinci katibi, 1953-cü ilin aprel-avqust aylarında Azərbaycan SSR Nazirlər Sovetinin sədri olub. O, müxtəlif illərdə Azərbaycan Kommunist Partiyası Bakı Şəhər Komitəsinin birinci katibi, Azərbaycan SSR Xalq Komissarları Sovetinin sədri, Azərbaycan Dövlət Siyasi İdarəsinin və Azərbaycan Fövqəladə Komissiyasının rəhbəri vəzifələrində də çalışıb.