Rusiyada polis bölməsinə aparıldıqdan sonra yoxa çıxan çeçen əsilli Seda Suleymanovanın rəfiqəsi Lena Patyaeva Sankt-Peterburqda təkadamlıq piket keçirərkən saxlanılıb. O, aksiyanı polis idarəsinin qarşısına keçirib.
Bakupost.az xəbər verir ki, etirazçı qadın əlində “Siz onu ölümlə üz-üzə qoydunuz. Bununla yaşayın! Seda Süleymanova haradadır?”, – sözləri yazılmış plakat tutub.
İndiyə qədər həm Sankt-Peterburqda, həm də Qroznıda dəfələrlə etiraz aksiyaları keçirən Lena Patyaeva rəfiqəsi Seda Suleymanovanın taleyinə aydınlıq gətirilməsini tələb edir.
2023-cü ilin avqustunda oğurluqda şübhəli bilinən şəxs kimi həbs olunan Seda Suleymanova polis bölməsinə aparıldıqdan sonra yoxa çıxıb. Onun haraya aparıldığı və başına nə gəldiyi haqda məlumat yoxdur.
Rusiya İstintaq Komitəsi Seda Suleymanovanın qətl ehtimalı ilə bağlı cinayət işini yalnız hadisədən altı ay sonra – 2024-cü ilin əvvəlində açıb.
Cavid, BakuPost