Super zənginlər rekord qırdı: Onlara düşən payı cəmi 10 günə "xərclədilər"

Bakupost.az xəbər verir ki, aparılan təhlilə əsasən, dünyanın ən zəngin 1 faizi 2026-cı il üçün onlara düşən ədalətli karbon emissiyası payını ilin ilk 10 günündə istifadə edib. "Oxfam” tərəfindən hazırlanan araşdırma göstərir ki, ən zəngin 0,1 faiz illik karbon büdcəsini cəmi üç günə keçib.

"Oxfam” bu həddindən artıq emissiyaların ən ağır nəticələrinin iqlim böhranına ən az töhfə verən qruplar tərəfindən yaşanacağını vurğulayıb. Ən çox zərər görəcək qruplar sırasında aşağı gəlirli ölkələrdə iqlim böhranının ön xəttində yaşayan icmalar, yerli xalqlar, həmçinin qadınlar və qız uşaqları yer alır.

Araşdırmaya görə, aşağı və orta gəlirli ölkələr bu emissiyaların yaratdığı dağıdıcı təsirlər qarşısında ən həssas mövqedədir. Qlobal miqyasda iqtisadi zərərin 2050-ci ilə qədər 44 trilyon funt-sterlinqə çata biləcəyi proqnozlaşdırılır. "Oxfam” Böyük Britaniyanın maliyyə naziri qarşısında çağırış edərək "iqlimi çirkləndirən həddindən artıq sərvətlər üzərində vergilərin artırılmasını” tələb edib. Təşkilat bildirib ki, Böyük Britaniyada ən zəngin 1 faizin səkkiz gün ərzində yaratdığı karbon çirkliliyi, ən yoxsul 50 faizin bir il ərzində yaratdığı emissiyaya bərabərdir.

Hesabata əsasən, super zənginlər təkcə birbaşa emissiyaların böyük hissəsinə görə məsuliyyət daşımır. Onlar eyni zamanda ən çox çirkləndirən sahələrə yatırım edərək dolayı emissiyaları da artırırlar. Orta hesabla bir milyarderin investisiya portfelinin ildə 1,9 milyon ton karbon qazı emissiyası yaradan şirkətlərlə əlaqəli olduğu qeyd olunur. Bu həcm təxminən 400 min benzinlə işləyən avtomobilin illik emissiyasına bərabərdir.

Alimlərin razılaşdığı qlobal hədəflərə görə, 2015-ci ildə imzalanmış Paris Sazişi çərçivəsində qlobal istiləşmənin sənaye öncəsi səviyyələrlə müqayisədə 1,5 dərəcə ilə məhdudlaşdırılması üçün dünyanın ən zəngin 1 faizinin emissiyalarını 2030-cu ilə qədər 97 faiz azaltması tələb olunur.