Təbiətə ən çox bağlı ölkələr – SİYAHI

61 ölkəni əhatə edən genişmiqyaslı psixoloji araşdırmaya görə, Nepal xalqı təbiətlə ən güclü bağa sahibdir. Siyahının sonlarında isə Böyük Britaniya, Hollandiya, Kanada, Almaniya, Yaponiya və İspaniya yer alır.

Bakupost.az xəbər verir ki, “Ambio” elmi jurnalında dərc olunan araşdırma, təbiətə bağlılığın insanların rifahını artırdığını və bioloji müxtəlifliyin qorunmasına töhfə verdiyini göstərir. Mütəxəssislər bildiriblər ki, bu dəyəri təşviq etməyən ölkələrdə bioloji müxtəlifliyin itirilməsi riski daha yüksəkdir.

Tədqiqat 57 min nəfər arasında aparılıb və mədəni, iqtisadi, coğrafi fərqlərin təbiətə münasibəti necə formalaşdırdığını ortaya qoyub. Nepalıların ardınca Cənubi Afrika, Banqladeş və Nigeriya gəlir.

Bununla yanaşı, Dünya Bankının “biznes aparmaq asanlığı” göstəricisinin yüksək olduğu ölkələrdə təbiətə bağlılıq zəif müşahidə olunub.

Alimlər “təbiətə yaxınlıqla ekoloji təşkilatlara üzvlük arasında çox zəif əlaqə” tapıldığını da vurğulayıb. Ümumilikdə araşdırma göstərir ki, urbanizasiya, yüksək gəlir və internet istifadəsi təbiətdən uzaqlaşmanı artırır.

Tədqiqatçılar hesab edir ki, insanla təbiət arasındakı əlaqənin bərpası üçün texnoloji inkişaf mənəvi təkamüllə tarazlaşdırılmalıdır. Onların fikrincə, “təbiətlə yenilənmiş münasibət” üçün sosial-iqtisadi sistemlər və bioloji müxtəliflik siyasətləri “texno-mənəvi” yanaşma ilə uzlaşdırılmalıdır.

Nəticə olaraq alimlər bildiriblər ki, təhsil, səhiyyə, yaşayış və incəsənət kimi sahələrdə insanların təbiətlə emosional təmasını artıran siyasətlər ölkələrin həm ekoloji, həm də psixoloji inkişafına töhfə verə bilər.

Cavid, BakuPost