Telefonlarını və gecələdiyi yeri tez-tez dəyişir – Maduro ölkəni kubalılara tapşırıb

Venesuela Prezidenti Nikolas Maduro ABŞ-ın hərbi müdaxilə ehtimalı artdıqca şəxsi təhlükəsizlik tədbirlərini gücləndirib. Mənbələr bildirir ki, Maduro yatdığı yeri və telefonlarını davamlı dəyişir, ən yaxın müttəfiqi Küba ilə təhlükəsizlik əməkdaşlığını dərinləşdirib.

Bakupost.az “New York Times”a istinadən xəbər verir ki, Venesuela Prezidenti ətrafında narahatlıq var, lakin prezident 12 illik hakimiyyəti üçün ən ciddi təhdidi aşa biləcəyinə inanır. Hökumətə yaxın mənbələr deyir ki, Maduro mümkün hücum və xüsusi qüvvələrin basqınlarına qarşı özünü qorumaq üçün tədbirləri artırıb. Bu tədbirlər xüsusilə sentyabrdan – ABŞ hərbi gəmilərini bölgəyə göndərəndən və Venesueladan narkotik daşıyan gəmiləri hədəfə alandan bəri intensivləşib.

Maduro kubalı cangüdənlərin fəaliyyət sahəsini genişləndirib və kəşfiyyatçıların Venesuela ordusunda rolunu artırıb. Buna baxmayaraq, Maduro ictimaiyyət qarşısında Vaşinqton təhdidlərini əhəmiyyətsiz göstərməyə çalışır, gözlənilməz tədbirlərdə iştirak edir, TikTok-da videolar paylaşır.