Yaxın Şərqdə yeni savaş: Səudiyyə-husi müharibəsi başlayır?

“Bakupost” xəbər verir ki, bu barədə husilərin hərbi sözçüsü Yəhya Saria “Əl-Məsirə” telekanalında məlumat verib.

Bu fonda deyəsən, İsrail də sözügedən gərginlikdə yer almağa çalışır.

İsrailin "Walla News" qəzeti Yaxın Şərqdəki diplomatik mənbələrə istinadən bildirib ki, Təl-Əviv Yəməndəki Husi qüvvələri ilə bağlı Səudiyyə Ərəbistanı ilə kəşfiyyat məlumatları paylaşıb.

Qeyd olunur ki, tərəflər arasında əlaqələr ABŞ Mərkəzi Komandanlığının (CENTCOM) vasitəçiliyi ilə baş tutub. Məlumata görə, İsrail Səudiyyə tərəfinə Husi qüvvələrinin mövqeyini və mümkün növbəti addımlarını daha yaxşı başa düşməyə kömək edib.

Siyasi şərhçi Elçin Xalidbəyli “Bakupost”a bildirib ki, husilərin Yəməndə bir sıra strateji yaşayış məntəqələri və obyektləri nəzarətə götürməsi bölgədə kifayət qədər ciddi problemlər yaradıb:

“Belədə yaranmış vəziyyət birbaşa və ya dolayısı ilə Yaxın Şərqdəki proseslərə təsir göstərir. Bu isə təbii ki, İranın maraqlarına cavab verir. Amma bir sıra ərəb ölkələri, o cümlədən Səudiyyə Ərəbistanının maraqlarını isə təhdid edir”.

Ekspert qeyd edir ki, İsrail də İranın nəzarəti altında olan husilərin fəaliyyətindən qətiyyən məmnun deyil:

“Ona görə də Əl-Riyadla husilər arasındakı qarşıdurmadan yararlanmağa çalışır. Belədə, həm Əl-Riyadla münasibətləri normallaşdırmağı, həm də bu məsələ ilə bağlı ortaq davranmaq yolunda addımlar atmağı düşünür. Yəqin ki, yaxın günlərdə proses üzrə müəyyən aydınlaşmalar üzə çıxacaq”.

Müsahibimiz hesab edir ki, yaxınlarda husilərə qarşı bir sıra dövlətlərin birləşdiyi hərbi-siyasi kampaniya başlaya bilər:

“Bu təkcə İsrailin Səudiyyə Ərəbistanına yönəlik addımları ilə bağlı deyil. Böyük Britaniya da bu məsələdə Əl-Riyada dəstək verir. London husilərlə müzarizə aparmaq üçün Səudiyyəyə hərbi məsləhətçilər göndərib. Məkkə alyansına uyğun olaraq burada Türkiyə və Pakistanın da mövqeyi böyük önəm daşıyır. İslamabad bir müddət öncə bəyan etdi ki, Səudiyyə Ərəbistanına qarşı atılan istənilən addıma sərt reaksiya veriləcək. Bütün bunlar onu göstərir ki, husilərin Yaxın Şərqdə situasiyanı gərginləşdirməsinə cavab olaraq onların əleyhinə hərbi-siyasi kampaniya artıq başlamaq üzrədir və İsrail də bu məsələdə müəyyən yer ala bilər”.