500 milyon dollar oğurlayaraq qaçan rus milyarder və arvadı öldürüldü

Bakupost.az xəbər verir ki, cütlük BƏƏ-nin Hatt şəhərində investorlarla görüş zamanı yoxa çıxıb.

Onların sürücüsü Novak və həyat yoldaşını göl kənarındakı dayanacaqda düşürüb. Cütlük daha sonra başqa bir avtomobilə minərək, ərazidən uzaqlaşıb və onlardan bir daha xəbər alınmayıb.

Təxminən bir ay sonra polis onların cəsədlərini kirayə götürdükləri villada aşkarlayıb. Araşdırmalar nəticəsində məlum olub ki, Roman Novak milyardlarla dollar dəyərində olduğu ehtimal edilən kripto pul kisəsi üçün fidyə məqsədilə qaçırılıb.

Hadisə ilə bağlı 8 nəfər saxlanılıb.

Onlardan 4-ü avtomobil və villanı icarəyə götürərək, cütlüyü aldatmaqda ittiham olunur. Hazırda istintaq davam edir.

Qeyd edək ki, bundan əvvəl mətbuatda rus kriptovalyuta treyderi Roman Novakın investorlardan aldığı 500 milyon dollarla Cənubi Afrikaya qaçdığı ilə bağlı xəbərlər dərc olunub. Məlumata görə, aldadılan investorlar arasında çinli və ərəb iş adamları, ukraynalı deputatlar, hətta Rusiya Dövlət Dumasının deputatı da olub. Novak əvvəllər də 4 milyon dolları mənimsəməkdə təqsirli bilinib, sonra Dubayda gizlənib və orada Teleqram "tokenləri" ilə bağlı yeni layihəsini işə salıb. Sentyabrda Rusiya hüquq-mühafizə orqanları kriptovalyuta birjalarında iki həftə axtarış apararaq Novakın əməliyyatlarının izlərini tapmağa çalışıblar.