112 min manatlıq dələduzluq: "İntihar həddinə çatmışam" - ŞİKAYƏT

O, bu barədə Bakupost.az-a şikayətində bildirib.

A.Əzizovun sözlərinə görə, Ələkbərli Yasin Tahir oğlu tərəfindən iş qurmaq vədi ilə aldadılıb, ümumilikdə 111.700 min manat məbləğində pulu qanunsuz yolla ələ keçirilib.

Zərərçəkənin iddiasına görə, Yasin Ələkbərli 2024-cü ilin aprel ayında bildirib ki, siqaret biznesi ilə məşğuldur, əgər pul verərsə, ona 25 faiz qazanc qaytaracaq. A.Əzizov bu vədə inanaraq 13.500 AZN məbləğində pulu Y.Ələkbərliyə verib. İkinci öz növbəsində bir neçə dəfə müxtəlif məbləğlərdə pulu qazanc kimi A.Əzizova qaytarıb. Daha sonra Y.Ələkbərli bildirib ki, daha çox pul verərsə, qazancı artıra bilər. Bu vədə inanan A.Əzizov dost-tanışdan aldığı ümumilikdə 111.700 AZN məbləğində pulu ona verib.

Ancaq bundan sonra A.Əzizov dəfələrlə müraciət etsə də, pulunu geri ala bilməyib. Y.Ələkbərli işlə Elman adlı şəxsin məşğul olduğunu bildirib.

Şikayətçi isə iddia edir ki, Elman adlı şəxsin bu məsələyə aidiyyatı yoxdur:

“Mən Elmanın nömrəsini tapdım. Zəng etdim, dedi ki, Yasinlə hansısa iş görmür və ona ümumiyyətlə, pul verilməyib. Mən çıxılmaz vəziyyətdə qalmışam. İş üçün pul aldığım insanlar hər gün qapıya gəlirlər. Polisə şikayət etmişəm. Lakin iş mülki məsələ kimi bağlandı. Halbuki mənə qarşı dələduzluq edildiyini sübuta yetirən sənədləri və mesaj yazışmalarını təqdim etmişəm. Lakin təhqiqatçı bu materiallara baxmadan, heç bir araşdırma aparmadan işi bağlayıb. Bu, sadəcə ədalətsizlikdir.”

Məsələ ilə bağlı Daxili İşlər Nazirliyinin Mətbuat Xidmətinin bölmə rəisi Nurlan Əliyev Bakupost.az -a bildirdi ki, vətəndaşın müraciəti əsasında ərazi üzrə polis orqanında təhqiqat araşdırması aparılıb. Araşdırmanın nəticəsinə əsasən, məsələnin mülki xarakterli olması müəyyən edildiyindən, ona aidiyyəti üzrə məhkəməyə müraciət etməsi tövsiyə olunub.

Hazırda zərərçəkmişin ümidləri yenidən hüquqi instansiyalara yönəlib. O, qəbul edilmiş qərarın ləğv edilməsini, yenidən obyektiv araşdırma başlanmasını və Ələkbərli Yasin Tahir oğluna qarşı Cinayət Məcəlləsinin 178.3.2 (dələduzluq) maddəsi ilə cinayət işi açılmasını tələb edir.

Vəkil Mehman Muradlı bildirib ki, Ali Məhkəmə Plenumunun dələduzluqla bağlı yekun qərarı var:

“Əgər pul həqiqətən iş qurulması məqsədi ilə alınıb, lakin işin icrası mümkün olmayıbsa, bu kommersiya məsələsi hesab olunur. Lakin pulun alınmasına baxmayaraq, iş üçün heç bir addım atılmayıbsa, bu, dələduzluq hesab olunur.”

Zərərçəkən Azər Əzizovun sözlərinə görə, ümumiyyətlə, heç bir iş görülməyib. Bu səbəbdən o, CM-nin 178.3.2 maddəsi ilə cinayət işi başlanılaraq əmələ hüquqi qiymət verilməsini istəyir.