Bakıda verilən sual Vensi əsəbiləşdirdi – “Daha vacib məsələlər var”

ABŞ-ın vitse-prezidenti Ceyms Di Vens Prezident Donald Trampın keçmiş prezident Barak Obama və birinci xanım Mişel Obamanı meymun kimi təsvir edən, süni intellekt vasitəsilə hazırlanmış və sosial şəbəkələrdə viral olan video ilə bağlı mövqeyini açıqlayıb.

Bakupost.az xəbər verir ki, Azərbaycanda “Epşteyn faylları” ilə bağlı sualları cavablandıran Vensdən eyni zamanda sözügedən video ətrafında yaranan qalmaqal barədə də soruşulub. Hadisənin ciddiliyini aşağı səviyyədə qiymətləndirən vitse-prezident məsələni tez bir zamanda kənara qoyaraq, bunu əsl mübahisə adlandırmadığını bildirib.

Məsələ ilə bağlı suala cavab verən Vens Trampı müdafiə edərək, “Bəli, yəni… bu, ya saat qurşaqlarının fərqindən, ya da çox məşğul olduğumuz üçün mübahisənin başlayıb mən diqqət yetirənə qədər artıq sakitləşdiyi hallardan biri idi”, – deyib.

Vens iddia edib ki, video Ağ Ev əməkdaşlarından biri tərəfindən paylaşılıb və prezident onu tam izləməyib. Onun sözlərinə görə, Tramp videonu gördükdən sonra dərhal sildirib. Vitse-prezident əlavə edib ki, artıq silinmiş bu videodan daha vacib mövzular var.

“Prezident dedi ki, videonu bir işçi paylaşıb. O, hətta bütün videoya baxmamışdı. Videonu tam görəndən sonra sildirib. Bu, əsl mübahisə deyil. Bizim diqqət yetirməli olduğumuz daha vacib məsələlər var”, – deyə Vens jurnalistlərə bildirib.

Trampın videonu paylaşdığına görə üzr istəyib-istəməməsi ilə bağlı suala isə Vens bir qədər narazı tonda cavab verib: “O, videonu paylaşıb sonra sildiyinə görə üzr istəməlidirmi? Xeyr, mən belə düşünmürəm. İnsanlar sosial mediada nəsə paylaşırlar və əgər xoşlarına gəlmirsə, sadəcə silirlər”.

Qeyd edək ki, adıçəkilən videoda ABŞ-ın keçmiş prezidenti və birinci xanımı Barak və Mişel Obamanın meymun kimi təsvir olunduğu animasiya görüntüləri yer alıb, fon musiqisi kimi isə “The Lion Sleeps Tonight” mahnısı səsləndirilib.

Paylaşım internetdə geniş qəzəbə səbəb olub. Bir çox istifadəçi videonun qara tarix ayı dövründə yayımlandığını vurğulasa da, Respublikaçı dairələrdən ciddi etiraz səslənməyib. Ağ Evin mətbuat katibi Karolin Livitt medianı saxta qəzəb yaratmaqda ittiham edib. Tramp isə videonun irqçi məzmun daşıdığı iddiasını qaçırılmış kontekst adlandıraraq üzr istəməkdən imtina edib və səhv etmədiyini bildirib.

Müsahibənin digər hissələrində Vens ABŞ-da ICE-in (İmmiqrasiya və Gömrük Mühafizəsi) fəaliyyəti ilə bağlı tənqidlərə və vətəndaş iğtişaşlarına qarşı çıxış edən amerikalı olimpiyaçıları da tənqid edib. O, idmançılardan prezidentə qarşı “pis davranışı” dayandırmalarını istəyib və siyasətdən uzaq durmağa çağırıb.

“Bəli, siyasətlə maraqlanan olimpiyaçılar olacaq. Bu, hər Olimpiadada baş verir. Amma mənim onlara məsləhətim ölkəni bir araya gətirməyə çalışmaqdır. Siz ölkəni təmsil edəndə həm Demokratları, həm Respublikaçıları təmsil edirsiniz. Oraya siyasətdən danışmaq üçün yox, idmanla məşğul olmaq, ölkənizi təmsil etmək və ümid edirəm ki, medal qazanmaq üçün gedirsiniz”, – deyə Vens vurğulayıb.

Cems Di Vens dünən həyat yoldaşı Uşa Vens və üç övladı ilə birlikdə regional səfər çərçivəsində Azərbaycanda olub. O, həmçinin ABŞ-ın vasitəçiliyi ilə Cənubi Qafqaz ölkələri arasında prosesi rəsmiləşdirmək məqsədilə Ermənistana da səfər edib. Vens Azərbaycan prezidenti İlham Əliyev və Ermənistanın baş naziri Nikol Paşinyanla görüşərək, ABŞ-ın hər iki ölkə ilə əməkdaşlığını davam etdirmək niyyətini bəyan edib.

Cavid, BakuPost