Misir 10 min fələstinliyə təlim keçir

Bakupost.az xəbər verir ki, bu barədə ərəb ölkələrinin rəsmilərinə istinadən “The Wall Street Journal” (WSJ) məlumat yayıb.

Məlumata görə, namizədlərin ilk qrupları artıq Misir hərbi akademiyalarında hazırlığa başlayıblar. Qəzzada atəşkəs əldə edildikdən sonra Misirin daha 5 min fələstinlini analoji təlim keçmək üçün qəbul edəcəyi planlaşdırılır. Gələcək qüvvələrin əsasını Fələstin Milli Administrasiyasının (PNA) təhlükəsizlik orqanlarının nümayəndələri təşkil edəcək, bəzi döyüşçülər "Fəth" hərəkatının tərəfdarları arasından cəlb oluna bilər. Bundan əlavə, Misir, İordaniya və bəzi Körfəz dövlətlərinin milli silahlı qüvvələri atəşkəsdən sonra anklavda təhlükəsizliyin təmin edilməsinə qoşula bilərlər.

PNA prezidenti Mahmud Abbasın müşaviri Mahmud əl-Həbbaş “The Wall Street Journal”a bildirib ki, layihə çox güman ki, beynəlxalq ictimaiyyət tərəfindən maliyyələşdiriləcək. Qəzet iddia edir ki, ərəb dövlətləri getdikcə HƏMAS-ın anklavda hakimiyyəti saxlamamasına təkid edir. Xüsusilə, iyul ayında Ərəb Liqası ilk dəfə olaraq hərəkatı tərksilah etməyə və zolağa nəzarətdən imtina etməyə çağırıb.