Misir Mərdanov bu xəbəri TƏKZİB ETDİ - 30 ildən artıqdır...

Belə ki, sabiq nazir ona ünvanlanan sualları cavablandırarkən təhsil sahəsində mövcud olan bir sıra məsələlərə münasibət bildirib. Lakin onun fikirləri birmənalı qarşılanmayıb və müxtəlif istiqamətlərdə şərh olunub.

Bildirilib ki, guya Misir Mərdanov bu sözləri ilə Dövlət İmtahan Mərkəzinin rəhbəri Məleykə Abbaszadəni hədəfə alıb.

"Bakupost" xəbər verir ki, sabiq nazir bununla bağlı “Facebook” hesabında paylaşım edərək bu iddiaları təkzib edib.

Misir Mərdanovun paylaşımını təqdim edirik:

“Bir neçə gün əvvəl “Pozan Media TV”dən mənimlə əlaqə saxlayaraq müsahibə verməyimi xahiş etdilər. Müsahibə zamanı jurnalistin suallarını cavablandırarkən təhsil sahəsində mövcud olan bəzi məsələlərə də münasibətimi bildirdim. Heç kəsin şəxsiyyətinə toxunmadan, müəyyən problemlərlə bağlı subyektiv fikirlərimi ifadə etdim.

Təəssüf ki, sonradan sosial şəbəkələrdə müsahibədə səsləndirdiyim fikirlər təhrif olunaraq, onların Dövlət İmtahan Mərkəzinin rəhbəri Məleykə Abbaszadəyə qarşı yönəldiyi iddia edildi. Bildirmək istəyirəm ki, bu iddia həqiqəti əks etdirmir.

Mən Məleykə Abbaszadəni 30 ildən artıqdır ki, yaxından tanıyıram. Uzun illər ərzində onunla birlikdə çoxsaylı tədbirlərdə iştirak etmişəm. Ona hər zaman hörmətlə yanaşmışam və bu gün də həmin hörmətimi qoruyub saxlayıram” – deyə, M.Mərdanov qeyd edib.