Qəbiristanlıqlarda “toy” – İranda öldürülən etirazçıların 40 mərasimləri musiqi və rəqslə keçirilir – VİDEO

İranda öldürülən etirazçıların ailələri İranda 40-cı gün mərasimlərini getdikcə açıq etiraz aktına çevirir, dini ayinləri rəqs, musiqi və toy mərasimlərini xatırladan simvolika ilə əvəz edirlər.

Bakupost.az “Iran International”a istinadən xəbər verir ki, yayılan videolarda dua oxunuşları əvəzinə şüarlar, ritmik hərəkətlər və əl çalmalar görünür.

25 yaşlı Məhəmmədhüseyn Əlixani üçün məzarı başında keçirilən 40 mərasimində yaxınları ənənəvi İslam mərasimi keçirmək əvəzinə matəm rəqsi ifa ediblər.



Əlixani yanvarın 8-də Tehranın Fəllah məhəlləsində təhlükəsizlik qüvvələri tərəfindən açılan atəş nəticəsində öldürülüb.


22 yaşlı idmançı İrfan Bozorqi üçün keçirilən anım mərasimində isə ailə üzvləri nişan mərasimlərində istifadə olunan simvolik toy sinilərini daşıyıblar.

“Tabəq-keşi” adlanan bu ritual adətən şənliklə əlaqələndirilir və matəm mərasimlərində istifadə edilmir.



Bozorqi yanvarın əvvəlində Fars vilayətinin Mərvdəşt şəhərində başından güllə yarası alaraq öldürülüb.

Xürrəməbaddan yayılan görüntülərdə Əmirhüseyn Şəkərəmi üçün keçirilən mərasimdə məzarı başında nağara və nəfəs alətləri səsləndirildiyi, bunun matəm rəqsi ilə müşayiət olunduğu görünür.



Adətən İran dəfn mərasimlərinə xas olan kədərli atmosferi alqışlar və enerjili ritmlər əvəz edib.

20 yaşlı Şəkərəmi yanvarın 8-də Kərəcdə keçirilən etirazlar zamanı qarın nahiyəsindən güllə yarası alıb və sonradan aldığı xəsarətlərdən dünyasını dəyişib.

Cavid, BakuPost