“Qəlbimə sadiq qalmalıydım” – Şəmkirdə xidmət etmiş tanınmış aktyorun Azərbaycan xatirələri

Rusiyanın tanınmış teatr və kino aktyoru Fyodor Dobronravov gənclik illərində hərbi xidmət zamanı maraqlı bir seçim edib.

Bakupost.az xəbər verir ki, aktyor paytaxtda xidmət etmək şansından imtina edərək, könüllü şəkildə Hava-Desant Qoşunları (HDQ) sıralarına qatılıb.

1978-ci ildə, 17 yaşında olarkən Taqanroqdan Moskvaya sirk məktəbinə daxil olmaq üçün gələn Dobronravov belə xatırlayır:

“Hərbi xidmət keçməyənləri sirk məktəbinə qəbul etmirdilər. Düşündüm ki, əgər xidmət edəcəmsə, onda yalnız HDQ-də olacağam. Başqa yol yoxdur”.

Gənc yaşına baxmayaraq, Dobronravov boks, basketbol və suya tullanma ilə məşğul idi və üç paraşüt tullanışı həyata keçirmişdi. Bataysk çağırış məntəqəsində zabitlər onu yüksək boyu, düzgün bədən quruluşu və fiziki hazırlığına görə seçmişdilər. Lakin Fyodor bu şansı rədd edərək belə deyib:

“Kreml alayında xidmət şərəfli idi, amma mənim arzum mavi beret geymək idi. Qəlbimə sadiq qalmalıydım”.

Dobronravov xatırlayır ki, HDQ nümayəndələri gəldiyi zaman o, çağırış məntəqəsinin arxa çıxışından qaçaraq ilk olaraq desantçıların sırasına keçib:

“Hərbçi məni gördü və dedi ki, tibbi baxımdan heç bir problem yoxdur, gedə bilərsən. Mən də heç tərəddüd etmədən ilk sıralarda yerimi aldım”.

Sonrakı illərdə o, Azərbaycanın Şəmkir rayonunda yerləşən 104-cü Qvardiya Hava-Desant Diviziyasının artilleriya polkunda xidmət edib, 122 millimetrlik haubitsanın komandiri olub və ordudan serjant rütbəsi ilə ehtiyata buraxılıb. Həmin dövrü xatırlayan Dobronravov, “Orduda çox romantika var. O, həm xidmətdə, həm silahda, həm də sənin kimi olan insanlarda, səmada və qoruduğun ölkədədir”.

Dobronravov həmçinin əlavə edib ki, Azərbaycan mədəniyyətini öyrənmək, dil və gündəlik həyat təcrübəsi onun şəxsi və peşəkar inkişafına müsbət təsir edib:

“Xidmət zamanı Azərbaycan dilini öyrənmək çətin idi, amma eyni zamanda bu mənə ölkənin mədəniyyətini daha yaxından tanımaq fürsəti verdi. Bu təcrübə həyatımda unikal bir dövr oldu”.

Aktyor Azərbaycanla bağlı xatirələrini də ətraflı bölüşüb. O deyir ki, xidmət etdiyi vaxt Azərbaycan təbiəti və şəhərləri onun üçün dərin təəssürat yaratmışdı:

“Bakı çox gözəl şəhərdir. Orada rus dilində danışanları görməkdən həzz aldım. Şəhərin ritmi, işıqları və enerjisi çox xoşuma gəldi”.

Dobronravov həmçinin Bakıda səfər etdiyi vaxt qonaqpərvərliyin onu təsirləndirdiyini bildirib:

“Teatr tamaşalarında və ictimai görüşlərdə göstərilən isti qarşılanış həqiqətən unudulmaz idi. İnsanlar ürəyiaçıq, yardımsevər və mehribandır”.

Azərbaycanlılarla şəxsi əlaqələrinə də toxunan Dobronravov qeyd edib:

“Həyatımda ən böyük azərbaycanlı dostum, həm rəhbər, həm insan kimi mənə çox təsir edən Məmməd Ağayev olub. Ümumiyyətlə, ruslar və azərbaycanlılar arasında səmimiyyət və mehribanlıq baxımından çox oxşarlıqlar var”.

Cavid, BakuPost