Sumqayıtda 27 saylı orta məktəblə bağlı şok iddia - Uşaqlardan 210 manat pul yığılır

BakuPost Cebhe.info-ya istinadən xəbər verir ki, adının çəkilməsini istəməyən valideynlərin dediyinə görə, bu məbləğ sinfin təmiri üçün tələb edilir. Məlumatı dəqiqləşdirmək üçün 27 saylı məktəblə əlaqə saxladıq.

Məktəbin direktoru Valid Mustafayev Cebhe.info-ya açıqlamasında iddianın doğru olmadığını deyib: “Bu, necə həqiqətəuyğun ola bilər? Sizcə 210 manat yığmaq olar? Bu məbləği hansı məktəb, hansı müəllim, hansı ağılsız yığa bilər? İddianı səsləndirən adam gəlsin, oturaq, danışaq, görək nə məsələdir və hansı əsasla belə bir iddianı irəli sürür? Əsaslandıra bilməsə, o zaman mən ona qarşı lazımli tədbirləri görəcəyəm. Mən burda, müəllim burda, valideynlər də burda... Məsələnin ən yaxşı kökünü axtarmaq budur”.

“Məktəbin təmirə ehtiyacı varmı?” sualına direktor belə cavab verib: “Bəli, məktəbin əsaslı təmirə ehtiyacı var. Dəfələrlə bununla bağlı Təhsil Nazirliyinə müraciət etmişəm”.