“ABŞ Ukraynanı canı bahasına qoruyacaq” – Merzdən iddialı açıqlama

Almaniya kansleri Fridrix Merz ABŞ-ın Ukrayna təhlükəsizliyi ilə bağlı öhdəliklərinə dair açıqlamalar verib.

Bakupost.az-ın xəbərinə görə, “ZDF” kanalında yayımlanan müsahibəsində Merz bildirib ki, ABŞ Ukraynanı demək olar ki, NATO üzvü kimi qorumağı planlaşdırır. O, Vaşinqtondan aldığı son məlumatların Ukraynanın müdafiəsi sahəsində açıq bir dəyişiklik olduğunu qeyd edib.

Merz bildirib ki, ABŞ-da siyasi və hərbi dairələr Ukraynanın NATO torpaqları qədər ciddi qorunması istiqamətində konsensus formalaşdırıb. Bu yanaşmanın Avropa üçün də böyük əhəmiyyəti var və Almaniya ilə digər NATO ölkələrinin oxşar addımlar atması gözlənilir.

Kansler vurğulayıb ki, ABŞ-ın bu mövqeyi Ukraynanın tam NATO üzvü olmadan da güclü təhlükəsizlik çətiri altında saxlanacağı deməkdir. Merz əlavə edib ki, Avropa da bu yeni təhlükəsizlik arxitekturasına uyğunlaşmalı və Almaniya Ukraynanın dəstəyini artırmaq üçün daha qətiyyətli xarici siyasət yürütməlidir.

O, həmçinin bildirib ki, Avropanın təhlükəsizliyi Ukraynanın müqavimətinə birbaşa bağlıdır və Rusiya təcavüzünün dayandırılması yalnız Ukrayna üçün deyil, bütün qitənin stabilliyi üçün həyati əhəmiyyət daşıyır. Bu çərçivədə Almaniyanın hərbi, iqtisadi və diplomatik dəstəyi artırması artıq yalnız seçim deyil, zərurətdir.

Cavid, BakuPost