Təcili: İran Türkiyəyə daha bir raket atdı

İrandan Türkiyəyə daha bir ballistik raket atılıb.

Bakupost.az xəbər verir ki, Türkiyə Müdafiə Nazirliyinin məlumatına görə, İran ərazisindən buraxılan və Türkiyə hava məkanına daxil olan raket Şərqi Aralıq dənizində yerləşən NATO hava və raketdən müdafiə qüvvələri tərəfindən zərərsizləşdirilib.

Nazirliyin açıqlamasına görə, raketin bəzi qalıqları Qaziantep vilayətində boş ərazilərə düşüb. Hadisə nəticəsində ölən və ya yaralanan olmayıb.

Nazirliyin bəyanatında Türkiyənin yaxşı qonşuluq münasibətlərinə və regional sabitliyə böyük önəm verdiyi qeyd olunub. Bununla yanaşı, ölkənin ərazisinə və hava məkanına yönələn hər hansı təhlükəyə qarşı qəti və dərhal tədbirlərin görüləcəyi vurğulanıb.



Nazirlik həmçinin bu istiqamətdə Türkiyənin xəbərdarlıqlarına əməl olunmasının bütün tərəflərin maraqlarına uyğun olduğunu bildirib.

Türkiyə Prezident Administrasiyasının Kommunikasiya İdarəsinin rəhbəri Burhanettin Duran hadisə ilə bağlı açıqlamasında bildirib ki, İrandan buraxıldığı müəyyən edilən ballistik raket Qaziantep şəhərinin Şahinbəy rayonu üzərində NATO-nun hava və raketdən müdafiə sistemləri tərəfindən vaxtında aşkar edilərək məhv edilib.

Onun sözlərinə görə, hadisə ilk andan etibarən dövlət qurumları tərəfindən yaxından izlənilib və zəruri müdafiə və təhlükəsizlik tədbirləri dərhal tətbiq olunub.

Duran əlavə edib ki, Türkiyə Müdafiə Nazirliyi başda olmaqla bütün aidiyyəti qurumlar tam koordinasiya şəraitində fəaliyyət göstərir və Türkiyənin hava məkanının və sərhəd təhlükəsizliyinin qorunması dövlət üçün prioritetdir.

Açıqlamada həmçinin qeyd olunub ki, bölgədə gərginliyin daha da artmaması və münaqişənin genişlənməməsi vacibdir. Türkiyə İran başda olmaqla bütün tərəfləri regional təhlükəsizliyi riskə atan və mülki şəxsləri təhlükəyə salan addımlardan çəkinməyə çağırıb.

Rəsmi Ankara vətəndaşları və media qurumlarını da təsdiqlənməmiş məlumatlar və dezinformasiya yaymamağa, yalnız rəsmi mənbələrin açıqlamalarına əsaslanmağa dəvət edib.

Cavid, BakuPost