İsrail İran aeroportunu vurdu – VİDEO

İsrailin Tehrana endirdiyi hava zərbələrindən sonra şəhərdə yerləşən Mehrabad hava limanı ərazisində yanğın baş verdiyi bildirilib.

Bakupost.az İran dövlət mediasına istinadən xəbər verir ki, hücumdan sonra hava limanında yanğın baş verib. Sosial şəbəkələrdə yayılan görüntülərdə də hava limanı ərazisindən alovların yüksəldiyi görünür.

1938-ci ildə istifadəyə verilən Mehrabad hava limanı Tehranın mərkəzinə yaxın ərazidə yerləşir və dövlətə məxsusdur. Uzun illər ərzində bu obyekt ölkənin ən böyük və ən intensiv işləyən hava limanı kimi fəaliyyət göstərib.

Hazırda da o, xüsusilə daxili uçuşlar üçün İranın əsas aviasiya mərkəzlərindən biri hesab olunur. 2004-cü ildən etibarən beynəlxalq uçuşların böyük hissəsi şəhərdən kənarda yerləşən İmam Xomeyni Beynəlxalq Aerportuna yönləndirilsə də, Mehrabad daxili hava nəqliyyatında mühüm rolunu qoruyub saxlayır.

Bir vaxtlar İranın əsas beynəlxalq hava limanı olan Mehrabad bir çox Tehran sakini üçün həm də simvolik əhəmiyyət daşıyır. Mənbələrin sözlərinə görə, köhnə infrastruktura malik olmasına baxmayaraq, Mehrabad uzun illər İran aviasiyasının ən hərəkətli mərkəzlərindən biri hesab olunurdu.

Yanğın görüntülərinin yayılmasından sonra İsrail ordusu (IDF) Tehrana qarşı “genişmiqyaslı hücum dalğası” başladıldığını açıqlayıb.




Cavid, BakuPost