Niderland və Belçika Qafqazı niyə qarışdırmağa çalışır?

Ən çox “fəallıq” göstərən ölkələr isə Belçika ilə Niderlanddır.

Bakupost.az xəbər verir ki, Belçika Krallığının Azərbaycan Respublikasındakı səfiri Julyen de Frepon və Niderland Krallığının Azərbaycan Respublikasındakı səfiri Marian de Yonq ayrı-ayrılıqda bu gün Xarici İşlər Nazirliyinə (XİN) çağırılıblar.

Görüş zamanı cari ilin aprelin 16-da Belçika və Niderland Parlamentləri tərəfindən qəbul edilmiş, Azərbaycanın suverenliyini və ərazi bütövlüyünü, eləcə də Azərbaycanla Ermənistan arasında davam edən sülh prosesini sarsıtmaq məqsədi daşıyan növbəti məsuliyyətsiz cəhdlər olan sənədlərə qarşı kəskin etiraz bildirilib və Azərbaycan əleyhinə qərəzi nümayiş etdirdiyi vurğulanıb.

Milli Məclisin deputatı Ceyhun Məmmədov Bakupost.az-a bildirib ki, Belkiça və Niderland parlamentləri tərəfindən belə qərəzli sənədlərin qəbul edilməsində erməni diasporunun rolu olub:

“Erməni diasporu münasibətləri yenidən gərginləşdirməkdə maraqlıdır. Artıq Bakı ilə İrəvan arasInda münasibətlər normallaşır, daha da yaxşılaşır. Ermənistan baş naziri Azərbaycanla əlaqələrin inkişaf etdirilməsinin vacibliyini vurğulayır. Bütün bunların fonunda reallıq hissini itərən Belçika və Niderland kimi ölkələrin bəzi siyasiləri Azərbaycana qarşı qərəzli hərəkətlərindən əl çəkmirlər”.

“Belələri birdəfəlik anlamalıdır ki, artıq qatar gedib. Bakı ilə İrəvan arasında müxtəlif istiqamətlərdə əlaqələr qurulub və inkişaf edir”.

Həmsöhbətimizin sözlərinə görə, bu cür cəhdlərlə onu edənlər Bakı ilə İrəvan arasında münasibətlərə xələl gətirə bilməyəcəklər:

“Bunlar hamısı əbəsdir. Ortada iradə var. Ona görə də aranı qarışdırmağa çalışanlar anlamılıdır ki, bu cür cəhdlərlə Bakı ilə İrəvan arasında münasibətlərə xələl gətirə bilməyəcəklər. Dərk etməlidirlər ki, bu çabaları heç bir səmərə verməyəcək. Bu qüvvələr bölgəmizdə sülhün bərqərar olmasını istəyirsə, yaxşı olar ki, başlanan sülh prosesinə maneə olmasınlar. Onlar bilməlidirlər ki, belə əməlləri ümumi proseslərə yalnız xələl gətirir”.