Qərb anlamadı ki, Rusiyanın gücü bundadır!

Bakupost.az xəbər verir ki. bu sözləri ekspert Natiq Cəfərli bildirib.

“AB ölkələrinin istəyi budur ki, Ukrayna öz fədakarlığı ilə daha 2-3 il müqavimək göstərsin, Avropa zaman qazansın, bu zaman kəsimində öz hərbi-sənaye kompleksini işə salıb, Rusiya ilə ehtimal edilən toqquşmaya hazır olsun.

Ukrayna haqqında Ukraynasız və ya Ukrayna ilə birgə - fərq etməz, nə danışırlar-danışsınlar, təəssüf ki, Kiyev üçün yaxşı çıxış yolu görünmür. Pislə, çox pis arasında gedib-gələn Ukrayna görürük, insanın ürəyi ağrayır, qəhrəman Ukrayna əsgəri, xalqı üçün insan yanıb tökülür. Halbuki, İstanbul anlaşması olsaydı, 2022-də Ərdoğanın əziyyəti nəticə versəydi, bu Ukrayna üçün bizim 1994-də imzaladığımız “Bişkek protokoluna” bənzər şərait yaradacaqdı. Bu sənəd Ukraynaya yaxın 10-15 ildə, postputin dönəmində öz ərazi bütövlüyünün və suverenliyinin bərpası üçün “əl yeri” qoyacaqdı. Təəssüf ki, olmadı.

İndi Zelenski ABŞ-a gedir, çox sərt, daha ağır şərtlərlə üzbəüz qalacaq, qəbul etsə də, imtina etsə də onun üçün dəyişən bir şey olmayacaq – siyasi karyerası bitir. Amma ilk gündən Qərbin anlamadığı bir məsələni Zelenski də anlamadı – halbuki Rusiyanın “genlərini” daha yaxşı bilməli idi. Qərb düşünürdü ki, Rusiya 40-50 min əsgər itirən kimi xalq ayağa qalxıb, Kremlin qarşısına toplanıb, Putinin istefasını, ya da müharibənin dayanmasını tələb edəcək. Qərb anlamaq istəmirdi ki, Rusiya əhalisinin 70% elə balaca “putinlərdir”, Rusiya üçün tarixin heç bir kəsimində insan həyatı əhəmiyyətli olmayıb – bu, Rusiyanın həm gücü, həm də faciəsidir. Bunu Qərb anlamaya bilərdi, amma Zelenski və komadası Qərbi ayıltmalı, silkələməli, bu gözləntilərin utopiya olduğunu, eləcə də belə içiboş sanksiyaların çalışmayacağını söyləməli idi”, - o vurğulayıb.