Türkiyə NATO-da ABŞ rolunu öz üzərinə götürə bilər

Bakupost.az Musavat.com-a istinadla xəbər verir ki, bu barədə Bloomberg agentliyinin məqaləsində qeyd olunur.

Agentlik Türkiyə prezidenti Rəcəb Tayyib Ərdoğanı Vaşinqtonda hörmət edilən və Avropa ilə ABŞ arasında gərgin münasibətlər fonunda "zirvə görüşünü düzgün şəkildə davam etdirə" bilən "güclü lider" adlandıran diplomatlara istinad edir.

Bloomberg-in müsahibə aldığı ekspertlər həmçinin Türkiyənin Avropanı silahla təchiz etməkdə artan rolunu qeyd ediblər. Məqalədə qeyd olunur ki, ötən il Türkiyənin müdafiə ixracatının yarıdan çoxu ABŞ, Avropa və digər Qərb müttəfiqlərinə gedib.

2020-ci ildən bəri Türkiyə müdafiə şirkətlərinin xarici satışları dörd dəfə artıb və bu, döyüş dronlarından və hərbi gəmilərindən tutmuş təlim təyyarələrinə, zirehli maşınlara və hərbi elektronikaya qədər geniş çeşiddə NATO ilə uyğun sistemlərin tədarükü ilə əlaqədardır.

Bloomberg-in məlumatına görə, sammitdə Avropada azalan Amerika hərbi mövcudluğunun yerini doldurmaq məqsədi daşıyan bir sıra böyük müdafiə müqavilələri açıqlanacaq.

Agentlik iddia edir ki, ABŞ administrasiyası strateji bombardmançı və qırıcı təyyarələrinin təxminən üçdə birini, demək olar ki, bütün kəşfiyyat və hücum dronlarını və donanmasının yarısını Avropadan çıxarmağı planlaşdırır.

Məqalədə deyilir: "Türkiyə özünü bu boşluğu doldurmaq üçün açar hesab edir".

Bloomberg qeyd edir ki, “soyuq müharibə”dən sonra Türkiyə, Avropa NATO müttəfiqlərinin böyük əksəriyyətindən fərqli olaraq, ordusunu azaltmayıb: keçən il ölkənin hərbi xərcləri 7% artaraq 30 milyard dollara çatıb.