Bədəndə belə damarlar ciddi xəstəlik əlamətidir – GİZLİ XƏBƏRDARLIQ

Bakupost.az Yenisabah.az-a istinadən xəbər verir ki, qabarmış, burulmuş və mavi rəngdə damarlar sadəcə estetik narahatlıq deyil, həm də gələcəkdə həyatınıza təhlükə yarada biləcək ciddi sağlamlıq problemlərinin göstəricisidir.

Damarların görünüşündəki dəyişikliklər bədənin verdiyi ən önəmli siqnallardan biridir. Əgər damarlar dəridə normadan artıq qabarmış, burulmuş və mavi rəngdə nəzərə çarpırsa, bu, qan dövranı sistemində problem olduğunu göstərə bilər. Ən çox rast gəlinən hallar varikoz genişlənmələridir. Onlar yalnız estetik narahatlıq yaratmır, həm də tromb əmələ gəlməsi, qan laxtalanması və ürək-damar xəstəlikləri kimi ciddi fəsadlara səbəb ola bilir. Belə damar dəyişiklikləri vaxtında diqqətə alınmasa, gələcəkdə infarkt və insult riskini də artırır.

Mütəxəssislər bildirir ki, damarların sağlamlığını qorumaq üçün ilk növbədə həyat tərzinə diqqət yetirilməlidir. Balanslı qidalanma, duz və yağlı yeməklərin azaldılması, siqaretdən uzaq durmaq və kifayət qədər fiziki aktivlik riskləri minimuma endirir. Xüsusilə uzun müddət ayaqüstə işləyən, ağır yük qaldıran və ya oturaq həyat tərzi keçirən insanlarda damar problemləri daha tez yaranır. Bu səbəbdən belə şəxslərin mütəmadi tibbi müayinədən keçməsi vacib hesab olunur.

Damar sağlamlığına biganə yanaşmaq həyat üçün ciddi təhlükə yarada bilər. Ona görə də damarların görünüşündə dəyişikliklər müşahidə olunduqda vaxt itirmədən həkimə müraciət edilməli, profilaktik tədbirlər gündəlik həyatın bir hissəsinə çevrilməlidir.