Səfirlərimiz niyə geri çağrılır?

Qeyd edək ki, bir qədər əvvəl iyulun 28-də də Azərbaycanın İtaliya, Tacikistan və Qazaxıstanda da yeni səfirləri təyin edilib. Elçin Hüseynli Azərbaycanın İtaliyada, Əlimirzamin Əsgərov Qazaxıstanda və Elxan Qəhrəman isə Tacikistanda fövqəladə və səlahiyyətli səfiri təyin edilib.

Nemət Zeynal oğlu Nağdəliyev Estoniyaya, Xəzər Nadir oğlu Fərhadov Malayziyaya səfir gğndərilib.

Sabiq xarici işlər naziri Tofiq Zülfüqarov “Bakupost”a bildirib ki, səfir təyinatı ilə bağlı dəyişikliklər rotasiyaya uyğun olaraq həyata keçirilir:

“Müvafiq qanuna görə səfirlərin xidmət müddəti müəyyən olunur. Ona görə də rotasiya zamanı yetişəndə, ona uyğun olaraq da sözügedən xidmətdə dəyişikliklər baş verir. Müstəsna hallarda bu müddət uzadıla da bilər. Yəni bu səfir dəyişikliklərində qeyri-adi nəsə yoxdur. Bu və ya digər ölkədə 5 illik müddətdə səfir xidməti həyata keçirilir. Sonra da onun əvəz olunması nəzərdə tutulur. Bu baxımdan hətta bəzi səfirlər öz fəaliyyətlərini digər ölkələrdə davam etdirirlər”.

T.Zülfüqarovun sözlərinə görə, adətən rotasiya işləri yay fəsli dövründə baş verir:

“Yay fəsli siyasi baxımdan bir qədər sakitlik dövrüdür. O baxımdan rotasiya, yəni dəyişmə işləri həmin müddətdə baş verir. Ölkələrdə siyasi həyat yenidən “qaynayandan” sonra isə səfirlər etibarnamələrini təqdim edib, xidmətlərini davam etdirirlər. Bu təcrübədən digər ölkələrdə də istifadə olunur”.