Sərdar Cəlaloğlu Mehdiyevə təriflər yağdırırdı - Razi Nurullayev

Sərdar Cəlaloğlunun sözlərinə görə, Əli Kərimlinin rəhbəri olduğu AXCP-də bir çox şəxslərin Ramiz Mehdiyevlə əlaqələrinin olması mümkündür və Razi Nurullayev də istisna deyil.

Bakupost.az xəbər verir ki, məsələ ilə bağlı Modern.az-a danışan Milli Cəbhə Partiyasının sədri, deputat Razi Nurullayev Ramiz Mehdiyevi ancaq televiziyada gördüyünü bildirib:

"Ramiz Mehdiyevlə mənim aramda hər hansı əlaqə axtarmaq tamamilə əsassız, cəfəng və uydurulmuş bir fikirdir. Mən o adamı yalnız televiziyada və şəkillərdə görmüşəm. Heç vaxt görüşməmişəm, danışmamışam, heç bir münasibətim olmayıb".

O, Sərdar Cəlaloğlunun bu cür iddialar səsləndirməyinin səbəbini də açıqlayıb:

"Sərdar bəy artıq uzun müddətdir ki, siyasətdə faktı bir kənara qoyub fantaziyalarla danışır. Onun son açıqlamaları göstərir ki, məqsəd analitik fikir vermək yox, sadəcə efirdə səs-küy yaratmaq, gündəmə çıxmaq və özünə yer tapmaqdır. Onun özü Ramiz Mehdiyev haqqında təriflər yağdırıb, fəaliyyətini öyüb, kitablarına dəyər verdiyini yazıb. Bu iddia da həmin səviyyənin məhsuludur. Heç bir fakt, heç bir dəlil, heç bir məntiq yoxdur. Sadəcə, fikir olsun deyə danışılmış bir söz.

Həqiqət isə çox sadədir: Sərdar Cəlaloğlu hər dəfə çömçə kimi müxtəlif mövzuları bir-birinə qatıb özünü “dərin bilən adam” kimi göstərməyə çalışır. Bu isə nə siyasi analizdir, nə də ciddiyyətin göstəricisi:

Mənim siyasi fəaliyyətim o dövrdə də, bu gün də şəffaf olub. Heç kim mənim adıma hansısa gizli əlaqə, kölgəli münasibət yapışdıra bilməz. Çünki belə bir şey olmayıb" - deyə o qeyd edib.