Suriya rəhbəri Moskvada Putindən Bəşər Əsədi istəyib –Rusiyaya daha kimlər qaça bilib? /ADLAR

Bakupost.az AzPost-a istinadən xəbər verir ki, Əl-Şaraa devrildikdən sonra Rusiyada sığınacaq alan Suriya prezidenti Bəşər Əsədin ekstradisiyasını istəyib.

2025-ci ilin sentyabrında Suriyada onun barəsində həbs qərarı verilib.

Rusiya Əsədin əsas müttəfiqi olub və 2011-ci ildən davam edən Suriya vətəndaş müharibəsi zamanı ona hakimiyyətdə qaalmağa kömək edib. Diktator devriləndə Rusiya ona siyasi fəaliyyətdən imtina etmək şərti ilə sığınacaq verib.

Bəşər Əsədin həyat yoldaşı Əsma onunla birlikdə Moskvaya köçüb. Onların böyük oğlu Hafiz Moskva Dövlət Universitetində oxuyurdu. Atası hakimiyyətdən uzaqlaşdırılmamışdan bir müddət əvvəl o, riyaziyyat üzrə namizədlik dissertasiyasını müdafiə edib. Əsədlərin digər iki övladı – qızı Zein və oğlu Kərim də Moskvadadır.

Əsəd ailəsinin Moskva şəhərində 18 mənzili var. Onlar Suriyadan ən azı 250 milyon dollar nağd pul çıxararaq Rusiya banklarına yatırıblar.

Keçmiş diktatorun kiçik qardaşı Mahir Əsəd də Moskvada yaşayır. O, əvvəllər Suriya ordusunun elit bölməsi olan Suriya Ərəb Ordusunun 4-cü Zirehli Diviziyasına komandanlıq edib. Mahir Əsəd həm də Yaxın Şərqdə yayılmış sintetik narkotik olan Captagon-u istehsal edən və alqı-satqı ilə məşğul olan dövlət narkotik kartelinin faktiki rəhbəri idi.

“Die Zeit” yazır ki, Mahir Əsəd isə “Four Seasons” otelində (keçmiş “Moskva” oteli) yaşayır və orada qəlyan çəkir.

“Die Zeit” hazırda Avropada yaşayan adı açıqlanmayan keçmiş yüksək rütbəli suriyalı hərbçiyə istinadən yazır ki, Əsəd rejiminin devrilməsindən sonra təxminən 1200 keçmiş suriyalı zabit Rusiyaya gedib.

The New York Times onlardan bəzilərini müəyyənləşdirə bilib. Əsədin Baş Qərargah rəisi və müdafiə naziri Əli Əyyub Moskvada yaşayır. O, vətəndaş müharibəsi zamanı Suriya Ərəb Ordusuna rəhbərlik edib. O, şəhərlərin atəşə tutulmasına və qadağan olunmuş silahların, o cümlədən kimyəvi silahların istifadəsinə görə məsuliyyət daşıyır.

Moskvada həmçinin Suriya Ərəb Ordusunun keçmiş baş komandan müavini və daha sonra müdafiə naziri olmuş Əli Abbas da var. Əsəd rejimi dövründə hərbi kəşfiyyatın sonuncu rəhbəri, digər işlərlə yanaşı, Sednaya işgəncə həbsxanasına da nəzarət edən Kamal əl-Həssan da oradadır.

Suriya kəşfiyyat xidmətlərinin işini koordinasiya edən Əsədin Baas Partiyasının strukturu olan Milli Təhlükəsizlik Bürosunun ən azı iki keçmiş rəhbəri də Rusiyada yaşayır. Onlar Əli Məmlük və Kifa Məlhəmdir. Bu təşkilatın digər keçmiş rəhbəri Məhəmməd Zeytun da Suriyadan qaçıb, lakin onun hazırda harada olduğu bilinmir.

Hazırda Moskvada yaşayan başqa bir şəxs Süheyl əl-Həsəndir. O, Əsədin xüsusi təyinatlı qüvvələrinə komandanlıq edib, vətəndaş müharibəsi zamanı İdlib və Hələb əyalətlərində əməliyyatlara başçılıq edib, kimyəvi silahdan istifadə, şəhərlərin atəşə tutulması və qırğınlar barədə göstəriş verib. The New York Times qeyd edir ki, o, öz hərəkətlərini bölgədəki Rusiya qüvvələri ilə ciddi şəkildə əlaqələndirirdi.